Почетна

Рускиот центар е единица при Универзитетот „Св. Кирил и Методиј“ основана во 2015 година, а со активна работа започнува на 11 јануари 2016 година.

Потребата од една ваква институција се наметна по долгогодишниот вакуум во македонската средина, кој настана по распадот на СФРЈ и соодветно на СССР.

Дотогашните хуманистички врски беа нагло прекинати и се одржуваа на тенка нишка која не ги задоволуваше потребите како на академската заедница, така и на македонската јавност. Со повеќестрана заложба, на иницијатива на Амбасадата на Руската Федерација во Скопје, а поддржана од Фондацијата „Руски мир“ од Москва идејата за формирање руски центар стана реалност.

Рускиот центар при УКИМ освен што се јавува како единица чија задача е да ја помогне меѓууниверзитетската соработка помеѓу двете земји, да ги зајакне врските во полето на науката и високообразовната дејност, на себе ја презеде обврската и ги отвори своите врати за сите граѓани на земјава. Па, така тој прерасна во институција која на граѓаните на земјава им нуди голем број можности, како од бесплатно изучување на рускиот јазик, предавања поврзани со руската култура, секојдневие, историја, место кадешто можат да се добијат важни информации за Руската Федерација, а исто така и точка за размена и за реализација на различни идеи поврзани со соработката помеѓу двете земји.